Les mios llabores

Hai xente que te pregunta tan inocente como impunemente: “Y tu, ¿qué yes?” Anque lo que quieren decir, en realidá, ye: “Y tu, ¿en qué trabayes?”. Nun te das muncha cuenta del matiz hasta que tienes un trabayu remuneráu y depués dexes de tenelu. Pásame muncho últimamente y, amás, ye una sensación estremadamente circunstancial: si tienes un trabayu, la pregunta parezte inocente, curiosidá protocolaria. Si nun lu tienes, siénteste incómoda, como si quixeren bilordiar sobre dalgo íntimo o que, polo menos, nun ye d’interés xeneral y públicu. Porque en realidá nun lo ye: la to mísera o allegre situación nun ye tema de conversación na consulta del dentista o na cola del supermercáu.

Nun lo faen con mala intención; nun se dan cuenta. Y tamién ye verdá que d’un tiempu acá andamos dalgo hipersensibles. Somos mui sentíes y, a la mínima, saltamos.

El trabayu yera lo que nos definía, lo que nos daba identidá y inclusive’l non trabayu nos la podía apurrir: ensin él, tovía podíemos consideranos parte del exércitu de reserva del capitalismu, col nuestru oficiu per delantre, anque ensin patrón y ensin llabor. Pero ye que dame que yá nun se trata nin siquiera d’axuntar un exércitu de reserva, grande y bien grande, sinón de crear una marabunta d’individuos con sentir de fracasu personal, ensin futuru, oficiu o beneficiu. ¿Teníes un oficiu? ¿Yeres, tiempu ha, “dalgo”? Actualízate, renuévate, reinvéntate. Nun val eso de tener un oficiu pa tola vida (yá nun digo un trabayu). Namás  son útiles los entes manipulables y reciclabes pa lo que faiga falta, en llucha unos contra otros pa salir del so requexu de perdedores.

Muncha xente, xeneralmente asalariao, entruga ónde tán les cuasi seis millones de paraes, que porqué nun salen a la cai. Nun tengo toles respuestes, pero sí sé una: cuando’l sistema te refuga, cuando lo que daba sentíu a la to identidá y al to papel na sociedá desaparez, resulta raro salir a pidir daqué. Quedasti fuera, ehí nun hai nada y de la nada, nada se saca. Amás, perdisti y quien pierde, nun xuega.

Esti sentimiento, obviamente, nun ye natural. Diz el psicólogu Ian Parker que surde d’una “psicoloxización de la vida cotidiana producida pol capitalismu”[1]. De lo que se trata ye de consiguir la felicidá pal individuu. Asegura esti autor que’l productu de la sociedá capitalista ye la psicoloxía positiva que busca la felicidá pal individuu. Tamién critica esti psicólogu que nun s’entiendan los problemes como procesos sociales. Claro: los problemes son nuestros, personales y intransferibles, polo que nun hai solución colectiva a ellos.

Ye dalgo asina como si te dixeran: nun sías negativa neña, que si cambies d’actitú, de xuru que cambia too. Yá verás como tienes suerte.  Y si nun la tienes, polo menos nun nos amargues cola to cara amargada. Faite un favor y sé feliz (o intenta paicelo pa facenos a nós el favor).

Nun me gusta esta psicoloxía positiva, inclusive me parez insultante en determinaes ocasiones. Pero tampoco nun me presta nada l’actitú de quexa continua que della xente exhibe: qué malos son, qué mala suerte, qué vamos a facer, esto ye una vergoña… Una cantinela que, como yá nos la sabemos, aburre, desespera y afita la impotencia. (Y nun digo yo que nun haya que desfogar ¿eh? Que soi la primera a la que-y presta soltar una bona parolada contra too. Pero en confianza, cola familia y les amigues, que pa eso tán, non como actitú vital). Pasamos del repelente  perfelizón Micky Mouse al coru de plañideres nun tris. Y eso nun pue ser sano, nin pal individuu nin pa la sociedá.

Yo topé un estáu a mediu camín en too ello: la mio situación, tán común y vulgar, de parada, ye una circunstancia que me permitió topar una identidá nueva. Agora siéntome más como una persona: non como periodista, non como muyer, non como un estáu civil, non como una rellación llaboral, non como una nacionalidá… Sí como un ser que ye humanu y que vive en sociedá. Y la que ta mala, per mala, ye la sociedá o, más bien, el réxime que la (mal)nutre. Yo, sicasí, toi a salvu de les enfermedaes llaborales y de l’alienacción del trabayu (asina que nun se-y ocurra a la psicoloxía positiva espetame que’l mio problema ye que tengo una actitú negativa).

Tampoco nun ye la intención d’esti artículu acabar con categoríes polítiques como clas trabayadora, ciudadanía o lo que se tercie que sía útil pa entender y iguar los problemes sociales. La intención ye namás reflexonar sobre esi estáu interior que ye’l de nun tener trabayu remuneráu, cómo afecta per dientro y cómo bregar con él.

Ello ye que  sigo pensando que, fundamentalmente, defínenos lo que facemos, pero eso nun tien porqué implicar precisamente exercer un trabayu remuneráu. Personalmente suelo preguntar a la xente: “Y tu, ¿a qué te dediques?” Asina pueden contestame que coleccionen sellos, que tán deprendiendo a facer ganchillu, qu’intenten quitase del viciu de nun trabayar o que se dediquen a les sos llabores (que ye lo que me prestaba contestar a mi cuando me pregunten qué soi, pero nun m’atrevo).  Lo que sían o lo que sientan ye cosa suya y lo demás son problemes sociales.

[1] En Belli, Simone (2007). Reseña de I. Parquer Revolution in Psychology. Athenea Digital, 12, 366-368. Disponible en http://psicologiasocial.uab.es/athenea/index.php/atheneaDigital/article/view/432


¿Y si toca equí?

Gústenme a min los finales y los principios d’añu. Parez que dalgo cambia, asina democráticamente, pa tol mundu a la vez y ensin distinciones de nengún tipu. Y faime ilusión. El 31 toi nerviosamente alegre y préstame entrar nel día 1 y pensar qu’estreno daqué sin falta de dir a les rebaxes, que nun tán los tiempos pa caprichos, por mui baratos que los pongan. Un añu nuevu, enteru y verdaderu, a la mio disposición. Qué emoción.

Sé que too esto ye una fatada, pero ye como va tirando una pela vida. El 22 d’avientu tamién ando toa azotada y pienso que yo y tola xente del mio pueblu vamos a brindar porque nos retiró’l Gordu. Y pa detrás d’Añu Nuevu tamién tengo lo mío, que toi cuasi segura de que’l 6 de xineru va a sacame de la cai la papeletina de llotería del equipu de balonmano de la mio sobrina.

Después llégame la primavera, que me presta pola vida cuando s’allarguen los díes y apuro les hores de sol como si fueran una merecida recompensa por pasar l’escuru iviernu ensin llamentame más de la cuenta (o por pasalu namás, que yá ye abondo). Pasu ente pasu, a lo tonto y a lo bobo, ehí ta San Xuan, una nueche máxica pa recordanos qu’hubo un tiempu en que los branos yeren infinitos.

¡Filipítica hippy al cantu! Pero ye verdá, ¿eh? Pa qué voi mentir si nun toi nuna entrevista de trabayu. Vivo d’ilusión n’ilusión, porque’l mio llau escuru, amás de malváu, ye aburríu. La mio filosofía de vida, en xeneral, ye “menuda mierda”. Asina de fonda y fondera. Parezme que ye una filosofía coherente pa les que  nacimos pa ser clas esplotable y tenemos per delantre un futuru de trabayu esclavu. Y eso con suerte. Que tamién tenemos el paru y la marxinación social. Yo véolo asina. Too eso de que’l trabayu dignifica o de que val pa realizase nun m’acaba de convencer. Soi más de Pavesse, d’aquello de “trabayar cansa” (laboro estanca creo que ye n’italiano). Ponte que vas a un pelotón de trabayu que ta construyendo les pirámides, a guelpe de látigu, y-yos espetes eso de que’l trabayu dignifica, que vivan la vida feliz, que carpe diem, que nel campu nacen flores, lalalá la la lalalá laralá..  Van mirate raro.

Y agora, ensin látigos, mándente a trabayar un ratiquín más de les tos ocho hores diaries al mesmu preciu o perbaxo que, como nel MediaMark, tiramos los precios. ¿O crees que soi tontu? Calcao.

Pos eso, que cola mio filosofía más fonda y fondera una abúrrese muncho y aburre a les demás. Asina que, superficialmente y a lo xó, disfruto de los mios momentos, con emoción. Como eso d’estrenar añu.  ¡Hola 2013! (Hai que saludar y ser educada, a ver si nos llevamos bien, que vamos convivir una temporadina).

Sé que lo de mio ye too impostura, dacuando nun me lo creo y tomo les mios precauciones. Por exemplu, nun se m’ocurre facer balance a final d’añu. Que pa deprimime nun necesito provocaciones. Tampoco nun me faigo propósitos, que nun hai nada peor que ser la propia fonte de les tos frustaciones. Namás saludo y, como tovía nun tengo motivos pa desconfiar, principiu l’añu alegremente. Que ta nuevín y, sacante causa de fuerza mayor, ye míu del 1 al 365.

Amás, tengo un amigu muncho más optimista que yo que me contó una cosina esti branu. Dicíame que se-y pasaba pela cabeza eso d’emigrar, pero qu’oi, que tenía mieu a marchar y qu’empezare equí la revolución y, hala, él nel estranxeru, sin facer nin ver la revolución. Y nun penséis que’l mio amigu ye de los que fala por falar, ¿eh? Que ye inxenieru y too y da-y milenta vueltes a cualquier idea o fenómenu, verosímil o inverosímil. Yo, pa variar, cuando me lo contó, riíme d’él y espúnxe-y les mios munches y razonaes razones pal escepticismu. Pero nel fondu, como tantes coses que me faen ilusión, préstame creer que tien razón. ¿Vendrá (la revolución), como nun revoltixu sorpresa, dientro de 2013? Ver veremos que falta fai.