Lo barato (nun) sal caro

Lo barato sal caro. Eso dicen. A veces ye verdá. Dacuando comprába-y a la mio perra pelotines de la china pa qu’enredara y nun-y duraben nin un asaltu. El resultáu: entretenimientu pa dos minutos y peazinos de collorinos per tola casa pa una selmana. L’últimu chisme que-y traxe foi bonu, más caru, pero bonu. Hai cuatro meses que lu ruca y ehí ta, tan pichi.

Asina que sí, podemos concluyir que lo barato sal caro, siempre y cuando falemos de la resistencia de los materiales. Sicasí, esta regla tien varies y variaes escepciones y, sobre manera, nun de los ámbitos más importantes de la vida: el del trabayu. El preciu del trabayu devalúase y oi, los beneficios medren. Nesti casu ta bastante claro: lo barato sal barato. Venga guapi, que güei toi que lo vierto y traigo la plusvalía regalada.

Mesmamente, va poco lleía un documentu de la patronal de la escuela concertada na qu’aseguraba qu’esta educación yera más barata: presumíen de pagar a les trabayadores “considerablemente menos” (sic) que na pública. Lo barato sal barato, anque nesti casu hai que lo matizar un poco más. Nesi documentu nun falaben de lo que-yos cuesta la educación concertada de más a les families nin del dineru públicu que guardaben nel bolsu pero, amiguina, cola Ilesia topamos.

Tovía hai otra variación a esa relativa sentencia de que lo barato sal caro. Ehí tienes a una montonera de xente atropando perres públiques y privaes: en Conseyos d’Alministración, nes altes esferes, dirixendo países o comunidaes. Pónense’l sueldu penriba de les nuestres posibilidaes y con dietes abondo, que nun falte de nada. Nesti casu, podemos dicir a les clares que, lo caro sal mui caro. Ye xente que cuesta muncho, nun da palu al agua y nun se-y conoz oficiu nin beneficiu. Y ahí tán, envueltos nuna despampanante capa impermeable a prueba de concencia.

Ello ye: a mí, de verdá, que nun me vuelvan a contar eso de que lo barato sal caro. Asina, a lo xo. Eso puedo aplicalo al chisme de la mio perra pero, qué quies, nun diz verdá más allá.

Artículu de Naguando

Anuncios